Shugaban gwamnatin mulkin soja ta Burkina Faso, Kyaftin Ibrahim Traore, ya sake jaddada cewa shi ne shugaban ƙasar kaɗai, tare da yin gargaɗin cewa zai ɗauki mataki cikin gaggawa kan duk wanda ya yi ƙoƙarin kalubalantar jagorancinsa.
Da yake jawabi ga shugabannin al'umma a garin Ouahigouya da ke arewacin ƙasar, Traore ya yi watsi da jita-jitar cewa akwai rikici tsakanin manyan jami'an gwamnatin mulkin soja, yana mai cewa ba za a iya samun shugabanni biyu a lokaci guda ba.
Ya ce duk wani jami'in gwamnati da ya kauce wa tsarin jagorancinsa ko ya yi kuskure, zai fuskanci hukunci ba tare da ɓata lokaci ba, yana jaddada cewa babu wani mutum da ya fi ƙarfin gwamnati a ƙarƙashin mulkinsa.
Jita-jitar rikicin ta ƙara ƙarfi ne bayan dogon rashin bayyana a bainar jama'a da wasu manyan jami'an gwamnatin mulkin soja biyu suka yi. Su ne Oumarou Yabre, shugaban hukumar leƙen asiri ta ƙasar, da kuma Farouk Azaria Sorgho, kwamandan Rundunar Rapid Intervention Battalion kuma kakakin gwamnatin mulkin soja.
Yabre bai fito fili ba tun ƙarshen watan Mayu, yayin da rahotanni ke cewa an kama ko tsare wasu daga cikin na kusa da shi. Haka kuma, Sorgho bai bayyana a bainar jama'a ba tun tsakiyar watan Mayu, inda wasu majiyoyin tsaro ke zargin cewa wasu masu biyayya ga Traore sun tsare shi, sai dai gwamnati ba ta tabbatar da hakan ba.
A cikin makonnin baya-bayan nan, an ƙara tsaurara matakan tsaro a babban birnin ƙasar, Ouagadougou, inda aka sake buɗe wasu hanyoyi tare da kafa sabbin wuraren binciken ababen hawa kusa da fadar shugaban ƙasa.
Lamarin ya ƙara haifar da hasashe kan yiwuwar samun sabani a cikin gwamnatin mulkin soja ta Burkina Faso, duk da cewa Traore ya nace cewa har yanzu shi ne ke da cikakken iko da jagorancin ƙasar.
.jpeg)
0 $type={blogger}:
Post a Comment