Firaministan Isra'ila, Benjamin Netanyahu, ya isa birnin Washington, D.C., domin wata muhimmiyar ganawa da Shugaban Amurka, Donald Trump, inda ake sa ran rikicin da ke tsakaninsu da Iran zai kasance babban abin tattaunawa.
Wannan ita ce ganawar farko tsakanin Netanyahu da Trump a Fadar White House tun bayan da Amurka da Isra'ila suka kaddamar da hare-haren soji kan Iran a farkon wannan shekarar.
Ziyarar ta kuma zo ne yayin da Isra'ila ke ci gaba da ƙara hare-haren soji a Gabar Yamma da Kogin Jordan, yayin da ƙasar ke shirin gudanar da babban zaɓe a watan Oktoba.
Kafin ganawar da Trump, ana sa ran Netanyahu zai halarci bikin tunawa da marigayi Sanatan Jam'iyyar Republican, Lindsey Graham, wanda ya kasance babban mai goyon bayan Isra'ila kuma aminin Shugaba Trump.
Jami'an Fadar White House sun bayyana cewa shugabannin biyu za su tattauna kan rikicin Iran da hare-haren Isra'ila a Lebanon da tsaron yankin Gabas ta Tsakiya, da kuma makomar yarjejeniyar Abraham Accords.
Haka kuma za su tattauna kan rikicin da ke ƙara kamari a Gabar Yamma da Kogin Jordan da kuma batutuwan zaman lafiya a yankin.
Duk da kyakkyawar alakar da ke tsakaninsu, Trump da Netanyahu sun samu saɓani kan wasu manyan batutuwa, ciki har da makomar rikicin Iran da batun sauya gwamnatin Iran da kasancewar sojojin Isra'ila a Lebanon, da kuma shirin Amurka na sayar wa Turkiyya jiragen yaƙin F-35.
Masana harkokin siyasa sun ce Netanyahu na kuma fatan samun goyon bayan Trump gabanin zaɓen Isra'ila da za a gudanar a watan Oktoba, domin ƙarfafa matsayinsa a idon masu zaɓe.
Ko da yake shugabannin biyu suna ci gaba da bayyana cewa dangantakarsu tana da ƙarfi, masu sa ido na ganin wannan ganawa za ta iya yin tasiri kan matakin da Amurka da Isra'ila za su ɗauka game da Iran da sauran rikice-rikicen yankin.
.jpeg)
0 $type={blogger}:
Post a Comment