Tsohon Shugaban Jam’iyyar APC a Kebbi Ya Rasu a Hannun ’Yan Bindiga

Tsohon shugaban jam’iyyar APC a ƙaramar hukumar Koko/Besse ta jihar Kebbi, Alhaji Muhammadu Mai Barga Besse, ya rasu ne a hannun ’yan bindiga bayan an yi garkuwa da shi.

An yi garkuwa da Besse tare da wani malamin addini na ƙungiyar Jama’atu Izalatil Bid’ah wa Ikamatis-Sunnah (JIBWIS), Alhaji Muhammad Maibarga.

Daga baya wani bidiyo mai tayar da hankali ya bayyana a kafafen sada zumunta, inda aka nuna mutanen biyu suna fuskantar wulakanci daga masu garkuwa da su a dajin Birnin Gwari, wani wuri da ake zargi ’yan bindiga masu aiki a wasu sassan arewacin Najeriya ke fakewa.

Rundunar ’yan sandan jihar Kebbi ta tabbatar da rasuwar Alhaji Maibarga a hannun masu garkuwa da mutane a ranar 10 ga watan Yuni.

Mai sharhi kan harkokin tsaro kuma mai bibiyar rikice-rikice, Bakatsine, ya tabbatar da rasuwar Muhammadu Mai Barga Besse a wani rubutu da ya wallafa a shafinsa na X ranar Talata, 23 ga watan Yuni.

Ya ce: “Wani mummunan labari ne, an tabbatar da cewa Alhaji Muhammadu Mai Barga Besse, tsohon shugaban APC na ƙaramar hukumar Koko/Besse a jihar Kebbi, ya rasu a hannun masu garkuwa da mutane.”

Ya ƙara da cewa mutanen biyu da aka gani a bidiyon da aka fitar daga dajin Birnin Gwari sun rasa rayukansu ba tare da sun sake haɗuwa da iyalansu ba bayan sace su.

Ya bayyana lamarin a matsayin wata babbar alama da ke nuna yadda matsalar tsaro ke ƙara tsananta a arewacin Najeriya.