Jami’an rundunar ’yan sandan jihar Ogun sun kashe wasu mutane biyu da ake zargi da yin garkuwa da mutane, tare da kwato makami da kudi da wasu kayayyaki a wani samame da aka kai bayan ceto wani da aka yi garkuwa da shi a jihar.
Rundunar ta ce sashen yaki da garkuwa da mutane ne ya gudanar da aikin a wani mataki na dakile garkuwa da mutane da sauran laifukan ta’addanci a fadin jihar.
A cewar sanarwar da kakakin rundunar, DSP Oluseyi Babaseyi, ya fitar, an yi garkuwa da mutumin ne a ranar 11 ga Yuni, 2026 a kauyen Ogbe da ke jihar Ogun.
Rundunar ta ce bayan samun rahoton, ta tura jami’an leken asiri da na musamman domin tabbatar da kubutar da wanda aka sace, lamarin da ya kai ga sake shi lafiya a ranar 18 ga Yuni.
Bayan haka, ’yan sandan sun ci gaba da bibiyar mambobin kungiyar masu garkuwar har suka gano mabuyarsu.
Sanarwar ta ce lokacin da wadanda ake zargin suka ga jami’an tsaro, sun bude wuta domin su tsere, lamarin da ya jawo musayar harbe-harbe.
Rundunar ta ce an kashe biyu daga cikin wadanda ake zargin, yayin da wasu suka tsere da raunukan bindiga.
Kayayyakin da aka kwato sun hada da bindiga mai harbi guda daya, harsashi da aka harba, waya, da kuma tsabar kudi Naira miliyan 2.2 da ake zargin kudin fansa ne daga ayyukan laifi.
’Yan sandan sun ce suna ci gaba da kokarin kama sauran wadanda suka tsere tare da fadada bincike kan ayyukan kungiyar.
Kwamishinan ’yan sandan jihar Ogun, Bode Ojajuni, ya yaba wa sashen yaki da garkuwa da mutane bisa jajircewa da kwarewa, inda ya tabbatar wa jama’a cewa za su ci gaba da gudanar da ayyukan tsaro domin kare rayuka da dukiyoyi.
Ya kuma bukaci jama’a su rika bai wa hukumomin tsaro bayanan da za su taimaka wajen yaki da aikata laifuka.
.jpeg)
0 $type={blogger}:
Post a Comment