Hukumar Kula da Aikin Hajji ta Najeriya (NAHCON) ta sanar da kammala jigilar dawo da sama da mahajjata ‘yan Najeriya 38,000 daga ƙasar Saudiyya bayan kammala aikin Hajjin 2026.
A cikin wata sanarwa da kakakin hukumar, Hajiya Fatimah Usara, ta fitar, ta ce jirgi na ƙarshe da ya ɗauko mahajjata daga jihar Zamfara ana sa ran zai isa Najeriya ranar Talata, lamarin da ya kawo ƙarshen shirye-shiryen Hajjin bana.
Usara ta bayyana cewa kammala dawo da mahajjatan ya rufe wani babban aiki na ƙasa da ya ƙunshi jigilar mahajjatan Najeriya zuwa Saudiyya da kuma dawo da su gida.
Ta ƙara da cewa mahajjata 12 daga Najeriya har yanzu suna karɓar magani a asibitoci daban-daban a Saudiyya saboda matsalolin lafiya. NAHCON ta ce tana bibiyar halin da suke ciki tare da shirin dawo da su Najeriya da zarar likitoci sun sallame su.
Hukumar ta yaba da haɗin kai da ƙoƙarin hukumomin jin daɗin mahajjata na jihohi, kamfanonin yawon buɗe ido na Hajji, masu ba da hidima, kamfanonin jiragen sama, ma’aikatan lafiya, jami’an tsaro da kafafen yaɗa labarai.
NAHCON ta amince cewa an samu wasu ƙalubale yayin gudanar da wannan babban aiki, amma ta ce za a yi amfani da darussan da aka koya wajen inganta ayyukan Hajji na gaba.
Hukumar ta kuma fara shirye-shiryen Hajjin shekarar 2027, inda ta umurci masu ruwa da tsaki da su fara shirye-shirye tun da wuri bisa ƙa’idojin Ma’aikatar Hajji da Umrah ta Saudiyya.
Shugaban NAHCON, Amb. Ismail Yusuf, ya gode wa Allah bisa nasarar Hajjin 2026, sannan ya yaba wa Shugaban Ƙasa Bola Tinubu da Mataimakinsa Kashim Shettima saboda goyon bayansu.
.jpeg)
0 $type={blogger}:
Post a Comment