Rukunin farko na mahajjata daga Jihar Ogun sun isa ƙasar Saudiyya cikin nasara domin gudanar da aikin Hajjin bana 2026, lamarin da ya zama tarihi bayan fara tashin jirgin ƙasa da ƙasa na farko daga sabon Filin Jirgin Sama na Gateway.
Jimillar mahajjata 345 ne suka tashi daga filin jirgin da ke Iperu Remo a daren Lahadi, inda suka sauka a Filin Jirgin Sama na Sarki Abdulaziz da sanyin safiyar Litinin. Daga cikinsu akwai maza 151 da mata 194, tare da jami’an Hukumar Jin Dadin Mahajjata ta jihar.
Bayan isarsu, jami’an Saudiyya sun tarbe su kafin a kai su masaukansu a birnin Madina, inda za su huta kafin fara sauran ayyukan Hajji.
Wannan jirgi shi ne na farko da ya tashi zuwa ƙasashen waje daga Filin Jirgin Sama na Gateway, wanda aka ƙaddamar kwanan nan daga Bola Ahmed Tinubu. Gwamnan jihar, Dapo Abiodun, ya bayyana wannan tafiya a matsayin babban ci gaba, yana mai cewa jirgin mai nisan kilomita 4,600 ya nuna yadda jihar ke samun nasara a fannin gine-gine da tattalin arziki.
Ya ƙara da cewa sabon filin jirgin zai sauƙaƙa zirga-zirga da bunƙasa kasuwanci, tare da rage wahalar da mahajjata ke sha a baya wajen tafiya zuwa Legas domin tashi zuwa ƙasashen waje.
Jami’an Hukumar Alhazai ta Ƙasa sun yaba da wannan ci gaba, suna cewa zai sauƙaƙa harkokin sufuri da kuma inganta tafiyar Hajji gaba ɗaya.
Haka kuma, shugabannin al’umma da na addini sun jinjina wa wannan shiri, yayin da mahajjata suka nuna farin ciki kasancewarsu cikin waɗanda suka fara amfani da sabon filin jirgin.
.jpeg)
0 $type={blogger}:
Post a Comment