An Kama Fiye da Mutane 90 a Zanga-zangar birnin London kan Haramta Kungiyar "Palestine Action".

An kama fiye da mutane 90 a tsakiyar birnin Landan yayin wata zanga-zanga da aka shirya domin nuna adawa da matakin gwamnatin Birtaniya na haramta ƙungiyar masu fafutuka kan Falasdinawa mai suna "Palestine Action".

An gudanar da zanga-zangar ne a dandalin Trafalgar Square, inda ƙungiyar Defend Our Juries ta jagoranta. Masu zanga-zangar sun riƙe alluna da ke nuna goyon bayansu ga Palestine Action tare da sukar hare-haren Isra’ila a Gaza.

Lamarin ya zo ne a daidai lokacin da ake ci gaba da shari’a kan haramcin ƙungiyar. Wata babbar kotun ƙasar Birtaniya ta riga ta bayyana cewa haramcin “ba bisa ƙa’ida ba ne kuma ya yi tsanani fiye da kima.” Duk da haka, an bai wa gwamnati damar ɗaukaka ƙara, wanda ya sa har yanzu haramcin yana aiki.

‘Yan sandan birnin London sun bayyana cewa sun aiwatar da kamen ne domin bin dokokin da ke aiki, tare da gargadin cewa nuna goyon baya ga ƙungiyar da aka haramta na iya zama laifi.

Sai dai masu fafutuka sun soki matakin, suna cewa hakan yana takura ‘yancin yin zanga-zanga cikin lumana da kuma ‘yancin faɗar albarkacin baki.

Ana sa ran shari’ar za ta koma kotu a ƙarshen watan Afrilu yayin da ake ci gaba da sauraron ƙarar.

SHARE THIS