Gwamnan jihar Taraba, Agbu Kefas ya koma jam’iyyar APC a hukumance

 

Gwamnan jihar Taraba, Agbu Kefas ya koma jam’iyyar APC a hukumance, inda ya zama na 30 a yawan gwamnonin dake Jam'iyyar  APC.

A yau Asabar ne gwamnan jihar Taraba, Agbu Kefas, ya sauya sheka daga jam’iyyar PDP zuwa jam’iyyar APC a hukumance, kuma mataimakin shugaban kasa Kashim Shettima ya tarbe shi a wani biki a Jalingo.

Shettima, wanda ya karbi bakuncin gwamnan a madadin shugaban kasa Bola Tinubu, ya bayyana wannan ci gaban a matsayin abin alfahari ga jam’iyyar da kuma kasa baki daya, inda ya yabawa Kefas bisa salon shugabancinsa na bai daya da kuma jajircewarsa na ci gaba.

Shettima ya ce jam’iyyar APC an yi ta ne a matsayin wani faffadan dandali na ‘yan Nijeriya masu son ci gaba, inda ya ce matakin da gwamnan Taraba ya dauka na shiga jam’iyyar ya dace kuma ya dace da manufofin jam’iyyar APC.

“Mun yi imanin al’ummomi za su dawwama idan suka amince da karfinsu, Jihar Taraba yanki ce mai muhimmanci a Najeriya, wadda ke da dimbin damar ci gaban kasa.

A baya dai jam’iyyar APC ta dage liyafar da ta shirya yi na Kefas domin karrama jami’an soji da ‘yan kasar da aka kashe kwanan nan a hare-haren da ‘yan ta’adda suka kai a watan Nuwamba 2025.

Nentawe Yilwatda, shugaban jam'iyyar APC na kasa, ya mika tutar jam'iyyar ga gwamnan, inda ya tabbatar da shi a matsayin shugaban jam'iyyar a jihar Taraba.

Kefas ya ce matakin ba wai don ci gaban Kan shi ba ne, face hanzarta samar da ci gaba a jihar.

"Wasu sun ce wannan bijirewa ce; Ina gaya muku game da manufa ne," in ji shi.

“Bana cikin jam’iyyar APC domin tsira, ina nan domin ci gaban jihar Taraba, mun koma jam’iyyar APC ne domin karfafawa da aiwatar da shirye-shiryenmu tare da jajircewarsu wajen kyautata rayuwa ga al’ummar jihar Taraba.”

SHARE THIS