Dubban mutane ne suka tsere daga Aleppo yayin da ake ci gaba da gwabza fada tsakanin sojojin Syria da dakarun SDF.

 

Ana ci gaba da gwabza kazamin fada tsakanin dakarun gwamnatin kasar Syria da mayakan Kurdawa karkashin jagorancin SDF a birnin Aleppo da ke arewacin kasar, lamarin da ya kori dubun dubatan mazauna gidajensu.

Dokar hana fita da rundunar sojin Syria ta ayyana ta fara aiki ne a ranar Alhamis da karfe 1:30 na rana (10:30 agogon GMT) a yankunan Kurdawa na birnin Sheikh Maqsoud da Ashrafieh da kuma Bani Zeid kafin dakarun gwamnatin Syria su fara abin da suka kira "ayyukan da aka yi niyya" kan wuraren SDF a wadannan yankuna.

Rundunar Sojojin Siriyan ta fitar da taswirar wuraren da ta ce sansanonin sojojin SDF ne a cikin unguwannin, inda ta bukaci fararen hula da su kaurace, tare da gargadin dakarun Kurdawa da kada su far wa mutanen da ke kokarin barin unguwannin.

Wuta da hayaki sun tashi daga unguwannin Ashrafieh na Aleppo da Sheikh Maqsoud, yayin da dakarun gwamnati suka fara kai farmaki kan yankunan da suka ayyana hari a baya. 

Rundunar ta SDF ta ce ta yi kazamin fada ta kowane bangare, kuma ta ce ta dakile wani kazamin harin da aka kai a unguwannin. 

Ya kara da cewa dakarun SDF sun kakkabo jirage marasa matuka guda biyu.

Kafofin yada labaran gwamnatin Syria sun rawaito cewa, dakarun SDF sun kai hari a unguwar al-Midan da luguden wuta da harsasai, sun kuma kai hari a jami'ar Aleppo da kuma asibitin al-Razi, inda suka jikkata wani likita a wurin.

SHARE THIS