Akalla jami'an 'yan sanda tara (9) da kuma 'yan ta'adda 15 ne suka mutu bayan wata mummunar arangama da ta barke da sanyin safiyar Talata a gundumar Ziarat da ke jihar Balochistan a kudu maso yammacin Pakistan.
A cewar kakakin gwamnatin jihar, Shahid Rind, lamarin ya faru ne bayan wasu 'yan ta'adda sun kai hari kan wurin da ake gina wani madatsar ruwa. Jami'an tsaro sun garzaya wurin domin mayar da martani, lamarin da ya rikide zuwa musayar wuta mai tsanani.
Ya bayyana cewa jami'an tsaro sun kashe akalla 'yan ta'adda 15 yayin farmakin, amma jami'an 'yan sanda tara, ciki har da manyan jami'ai biyu, sun rasa rayukansu yayin gudanar da aikinsu.
Har zuwa yanzu babu wata ƙungiya da ta ɗauki alhakin harin. Sai dai hukumomin Pakistan sun zargi ƙungiyar Tehreek-e-Taliban Pakistan (TTP) da aikata wannan hari.
Jihar Balochistan ta dade tana fama da hare-haren 'yan tawaye da ƙungiyoyin masu ɗauke da makamai. Yankin na da muhimmanci saboda arzikin ma'adanansa da kuma kasancewarsa muhimmin ɓangare na aikin China-Pakistan Economic Corridor (CPEC).
Hukumomin tsaro sun ce sun ƙaddamar da ƙarin samame a yankin yayin da ake ci gaba da bincike kan harin.
.jpeg)
0 $type={blogger}:
Post a Comment