Maroko ta lallasa Kanada 3-0, ta kai zagayen daf da na kusa da na ƙarshe a Gasar Kofin Duniya

Ƙungiyar ƙwallon ƙafa ta Maroko ta samu tikitin zuwa zagayen daf da na kusa da na ƙarshe na Gasar Kofin Duniya ta 2026 bayan da ta doke mai masaukin baƙi Kanada da ci 3-0 a wasan zagaye na 16 da aka buga yau Asabar a birnin Houston na ƙasar Amurka.

Bayan an tashi daga hutun rabin lokaci babu ci, ɗan wasan tsakiya Azzedine Ounahi ya fara zura wa Maroko ƙwallo a minti na 50 da fara wasan. Yayin da Kanada ke ƙoƙarin rama ƙwallon, Ounahi ya sake zura ta biyu a minti na 82, kafin Soufiane Rahimi, ya ƙara ta uku a cikin lokacin da aka ƙara.

Kanada ta fara wasan da ƙwazo, inda ta samu damar da zata iya zura ƙwallaye da dama a farkon wasan, amma mai tsaron ragar Maroko, Yassine Bounou, ya hana su nasara ta hanyar dakatar da kwallayen.

Maroko ta kuma fuskanci matsala bayan ɗan wasanta mai taka leda Ismael Saibari ya fita sakamakon rauni tun a farkon wasan. 

Duk da haka, ƙungiyar ta dawo da ƙarfi bayan hutun rabin lokaci inda ta mamaye wasan.

An kuma sha fafatawa mai zafi, inda alkalin wasa ya bai wa 'yan wasa shida katin gargadi, ciki har da kyaftin ɗin Maroko Achraf Hakimi da ɗan wasan Kanada Richie Laryea.

Da wannan nasarar, Maroko za ta kara da wadda ta yi nasara tsakanin Faransa da Paraguay a zagayen daf da na kusa da na ƙarshe, yayin da tafiyar Kanada a gasar ta kare duk da tarihinta na kai wa zagayen 'yan 16 a karo na farko.

• Tweet
• Share
• Share
• Share
• Share