Akalla Falasdinawa biyar ne, ciki har da wata yarinya mai shekaru tara, suka mutu a sabbin hare-haren da sojojin Isra'ila suka kai a sassa daban-daban na Zirin Gaza, kamar yadda jami'an lafiya na Gaza suka bayyana.
Rahotanni sun ce yarinyar ta mutu ne bayan harbin da aka yi kusa da sansanin 'yan gudun hijira da ke gabashin sansanin Al-Bureij a tsakiyar Zirin Gaza.
A wani hari na daban kuma, jirgin yaki mara matuki na Isra'ila ya kai farmaki kan wani wurin aikin ƙira a unguwar Sabra da ke birnin Gaza, lamarin da ya yi sanadin mutuwar mutum hudu tare da jikkata wani.
Sojojin Isra'ila sun tabbatar da kai harin, inda suka ce sun kai farmaki kan abin da suka kira "ababen more rayuwa na 'yan ta'adda," ba tare da bayar da karin bayani ba.
Jami'an lafiya sun kuma ce wasu Falasdinawa biyu sun mutu daga raunukan da suka samu a hare-haren Isra'ila da aka kai a baya a yankunan Al-Bureij da gabashin Khan Younis.
Sabbin hare-haren na zuwa ne duk da yarjejeniyar tsagaita bude wuta da Amurka ta shiga tsakanin Isra'ila da Hamas a watan Oktoban 2025. Ma'aikatar Lafiya ta Gaza ta ce tun bayan fara yarjejeniyar, hare-haren Isra'ila sun kashe fiye da Falasdinawa 1,098 tare da jikkata sama da 3,500.
A halin yanzu, shugabannin Hamas na ci gaba da tattaunawa a birnin Alkahira na Masar kan aiwatar da mataki na biyu na shirin zaman lafiya da Amurka ke marawa baya, inda ake tattauna batun kwance damarar Hamas da kuma janyewar sojojin Isra'ila daga Gaza.
Sai dai har yanzu ba a cimma wata matsaya ba.
.jpeg)
0 $type={blogger}:
Post a Comment