Ƙasar Morocco ta samu nasaran tsallakawa zuwa zagayen ‘yan 16 na Gasar Cin Kofin Duniya ta 2026 bayan ta doke Netherlands a bugun fanareti, bayan an tashi wasan da ci 1-1.
Mai tsaron ragar Morocco, Yassine Bounou, ya zama gwarzon wasan bayan ya tare bugun fanareti na biyar da Crysencio Summerville ya yi wa Netherlands, kafin Ismael Saibari ya zura fanaretin da ya bai wa Morocco nasara da ci 3-2 a bugun daga kai sai mai tsaron gida.
Wannan nasarar ta sa Morocco za ta kara da Canada a zagayen gaba a birnin Houston ranar Asabar.
Wasan ya kasance mai cike da kalubale, inda kungiyoyin biyu suka samu damammaki masu yawa, tare da taka leda mai zafi.
Netherlands ce ta fara cin kwallo a karo na biyu ta hannun Cody Gakpo, bayan sauya salon wasa da shigowar Wout Weghorst.
Sai dai Morocco ta rama a mintunan karshe lokacin da Issa Diop ya yi amfani da kai ya zura kwallo daga bugun da Chemsdine Talbi ya kawo, lamarin da ya tilasta a kara lokacin wasa.
A karin lokacin ma kungiyoyin biyu sun ci gaba da fafatawa, amma masu tsaron raga sun taka rawar gani. Morocco ta kusa samun nasara bayan Soufiane Rahimi ya samu damar zura kwallo, amma Bart Verbruggen ya yi wata ceto mai ban mamaki.
A bugun fanareti, Morocco ta farfado bayan ta rasa bugunta na farko, inda daga bisani ta samu nasara ta ci gaba da tafiyar da ita a gasar.
.jpeg)
0 $type={blogger}:
Post a Comment