DR Congo ta kafa tarihi a gasar kofin duniya bayan ta riƙe Portugal da ci 1-1.

Ƙasar Jamhuriyar Dimokuraɗiyyar Congo (DR Congo) ta kafa tarihi a gasar cin kofin duniya ta 2026 bayan ta samu maki na farko a tarihi a gasar, sakamakon kunnen doki 1-1 da ta yi da Portugal a wasan farko na rukunin K.

Gasar cin kofin duniya ta shida ta Cristiano Ronaldo ta fara da rashin daɗi, yayin da DR Congo ta nuna ƙarfi ta kuma iya fafatawa da Portugal.

Portugal ce ta fara cin ƙwallo a minti na shida, bayan da João Neves ya zura ƙwallo da kai daga ƙwallon da Pedro Neto ya kawo.

Sai dai DR Congo ta rama kafin a tafi hutun rabin lokaci, inda Yoane Wissa ya ci ƙwallon kai, wanda ya zama ƙwallon farko da ƙasar ta ci a gasar cin kofin duniya.

DR Congo, wadda ta fara buga gasar cin kofin duniya tun shekarar 1974 lokacin da ake kiranta da Zaire, ta ci gaba da matsa lamba kan Portugal a duk lokacin wasan.

Cristiano Ronaldo mai shekara 41 bai yi tasiri sosai a wasan ba, inda ya rasa wasu damammaki da za su iya bai wa Portugal nasara.

Portugal ta fi riƙe ƙwallo, amma ta kasa samun damar da za ta kammala wasan da nasara, yayin da DR Congo ta nuna jajircewa.

Dan wasan DR Congo Cédric Bakambu ya kusa ƙara ƙwallo, amma bugunsa ya buga sandar raga.

Portugal ta kusa ta ci ƙwallo ta hannun João Cancelo, amma aka soke ta saboda an samu satar gida.

Wannan sakamakon ya bai wa DR Congo damar murnar wani babban tarihi a dawowarta gasar ƙwallon ƙafa ta duniya.

• Tweet
• Share
• Share
• Share
• Share