Ƙasashen Afirka bakwai sun samu nasaran kaiwa matakin 'yan 32 na gasar cin kofin duniya na 2026.

Ƙasashen Afirka bakwai ne zuwa yanzu suka samu gurbin shiga zagayen gaba na ’yan 32 a gasar Cin Kofin Duniya na 2026, abin da ya nuna irin ƙoƙarin da ƙungiyoyin Afirka suka yi a wannan sabuwar gasa da aka fadada.

Ƙasashen da suka tabbatar da shiga zagayen gaba sun haɗa da Morocco da Afirka ta Kudu da Côte d’Ivoire da Masar da Cape Verde da Senegal da Ghana.

Morocco ta samu damar wucewa ne bayan ta kammala a matsayi na biyu a rukunin C, yayin da Afirka ta Kudu ta kafa tarihi ta hanyar shiga matakin fitar da ƙungiyoyi a karon farko.

Côte d’Ivoire ta tsallaka bayan ta yi bajinta a rukunin E, yayin da Masar ta samu gurbi bayan ta kammala a matsayi na biyu a rukunin G.

Cape Verde, wadda ke buga gasar a karon farko, ta ci gaba da ba da mamaki bayan ta kammala matakin rukuni ba tare da an doke ta ba, kuma yanzu za ta kara da zakarun duniya Argentina.

Senegal ma ta samu damar shiga bayan babbar nasara da ci 5-0 a kan Iraq, yayin da Ghana ta tabbatar da matsayinta kafin wasan ƙarshe na rukuni.

Har yanzu Algeria da Jamhuriyar Dimokuraɗiyyar Kongo suna fafatawa domin samun sauran guraben Afirka kafin wasannin ƙarshe na rukuni.

Gasar Cin Kofin Duniya na 2026 shine na farko da ta ƙunshi ƙasashe 48, inda ƙungiyoyi 32 za su shiga matakin fitar da gwani.