Ambaliyar Ruwa Ta Yi Sanadiyyar Mutuwar Mutane 13 a Babban Birnin Ghana.

Akalla mutane 13 ne suka mutu a birnin Accra, babban birnin Ghana, bayan mamakon ruwan sama ya haddasa mummunar ambaliyar ruwa a sassan birnin.

Hukumar kashe gobara ta Ghana ta bayyana cewa ana ci gaba da gudanar da aikin ceto, inda tuni aka kubutar da mutane sama da 470 daga wuraren da ambaliyar ta shafa. Mahukunta sun gargadi cewa adadin wadanda suka mutu na iya karuwa yayin da ake ci gaba da bincike da ceto.

Ruwan ya nutsar da gidaje da motoci da hanyoyi da wuraren kasuwanci, musamman a yankunan da ke kasa.

Gwamnati ta bukaci mazauna wuraren da ke cikin hadari su kaura zuwa wurare masu tsawo da aminci tare da gujewa shiga wuraren da ruwa ya mamaye.

Hukumar kula da yanayi ta Ghana ta yi gargadin cewa ana sa ran sake samun karin ruwan sama mai karfi a kudancin kasar, lamarin da ka iya kara jawo ambaliyar ruwa.

Kamfanonin samar da wutar lantarki sun dakatar da wutar lantarki a wasu yankunan da ambaliyar ta shafa saboda kare kayan aiki da rayukan ma’aikata.

Mahukunta sun ce matsalar magudanan ruwa da toshewar hanyoyin ruwa da kuma gine-ginen da aka yi ba bisa ka’ida ba a kan hanyoyin ruwa na daga cikin abubuwan da suka kara tsananta ambaliyar.

Masana muhalli sun bayyana cewa lamarin na nuna karuwar barazanar sauyin yanayi da kuma saurin bunkasar birane ba tare da ingantaccen tsari ba.