Wani dan bindiga ya kashe kansa bayan ya jikkata mutane 16 a wata makaranta a Turkiyya.

Wani tsohon ɗalibi ya buɗe wuta a tsohuwar makarantarsa a ranar Talata a Turkiyya, inda ya jikkata mutane 16, ciki har da ɗalibai, kafin daga bisani ya kashe kansa, in ji jami’ai.

An tura rundunar tsaro ta musamman zuwa makarantar da ke lardin Sanliurfa a kudu maso gabashin Turkiyya, yayin da aka kwashe ɗalibai daga wurin, kamar yadda gwamnan yankin, Hasan Sildak, ya shaida wa manema labarai.

Hotunan talabijin sun nuna motocin asibiti a wajen makarantar da ke gundumar Siverek, yayin da ɗalibai ke gudu cikin firgici suna barin ginin makarantar.

Gwamnan ya bayyana cewa wanda ya kai harin tsohon ɗalibi ne a makarantar, wanda aka haifa a shekarar 2007.

“Ya kashe kansa bayan da ‘yan sanda suka matsa masa,” in ji gwamnan.

“Mun kwashe ɗalibai daga makarantar kuma za mu gudanar da cikakken bincike kan wannan mummunan lamari,” ya ƙara da cewa.

Rahotannin kafafen yada labarai na cikin gida sun ce yawancin waɗanda suka jikkata ɗalibai ne.

SHARE THIS