Amurka ta fara hana visa ga masu karya ‘yancin addini a Najeriya

Gwamnatin Amurka ta fara aiwatar da sabon mataki na hana visa ga wasu mutane a Najeriya da ake zargi da hannu wajen take hakkin ‘yancin addini.

A cewar rahotanni, matakin yana cikin manufofin Amurka na kare ‘yancin addini a duniya, inda za ta iya hana shiga ƙasar ko bayar da visa ga duk wanda aka tabbatar yana da hannu a:

Tada rikici ko tashin hankali da ya shafi addini

Tallafawa ko ƙarfafa hare-haren da suka shafi addini

Ko shiga cikin cin zarafin mutane saboda bambancin addini

Rahoton ya kuma nuna cewa matakin na iya shafar wasu ‘yan uwa na kusa a wasu lokuta.

Amurka ta bayyana cewa manufar ita ce tabbatar da kariya ga haƙƙin ɗan Adam, musamman ‘yancin addini, tare da tabbatar da cewa duk wani mai hannu a take hakki ya fuskanci takunkumi na diflomasiyya.

Wannan mataki ya biyo bayan damuwa da wasu ‘yan majalisar Amurka suka nuna kan rahotannin rikice-rikicen da suka shafi addini a Najeriya.

Sai dai a lokuta da dama, hukumomin Najeriya da masu ruwa da tsaki sun bayyana cewa yawancin rikice-rikicen da ake samu a ƙasar suna da alaƙa da ta’addanci da ayyukan ‘yan bindiga, ba wai rikicin addini kai tsaye kaɗai ba.

A taƙaice, sabon tsarin na nufin cewa duk wanda aka tabbatar yana da hannu a take hakkin ‘yancin addini a Najeriya na iya fuskantar hana shi shiga Amurka ko samun visa.

SHARE THIS