Tinubu Ya Tabbatar wa ‘Yan Najeriya cewa Wutar Lantarki Za Ta Inganta nan bada jimawa ba.

Shugaban Ƙasa Bola Ahmed Tinubu ya bai wa ‘yan Najeriya tabbacin cewa matsalar rashin isasshen wutar lantarki da ake fama da ita a kwanakin nan za ta inganta nan ba da jimawa ba.

Shugaban ya bayyana hakan ne yayin da yake jawabi a taron ƙasa na jam’iyyar All Progressives Congress (APC), wanda aka gudanar a Abuja a ranar Juma’a, 27 ga Maris.

Ya ce: “Ina tabbatar muku, da yawa daga cikinku na kokawa kan matsalar lantarki; muna mai da hankali sosai a kai. Wutar lantarki za ta inganta, kuma muna tabbatar muku za a samu dama da ci gaba a fannin masana’antu. Ta hanyar kamfanin kula da kadarorin wutar lantarki na Grid Asset Management Company, za mu ƙara kimanin megawatt 1,500 a wani sabon layin rarraba wutar lantarki.”

Tinubu ya ƙara da cewa tasirin shirye-shiryen gwamnatinsa a bayyane yake kuma ana iya aunawa, ba wai kalamai kawai ba kamar yadda wasu ‘yan adawa ke ikirari.

Ya ce: “Muna motsawa daga yanayin tsira kawai zuwa samun daidaito da kwanciyar hankali a tattalin arziki.”

SHARE THIS