Yan bindiga sun sace mutane 10 a wani sabon hari da suka kai jihar Kano

An samu rahoton wasu 'yan bindiga sun yi garkuwa da mutane 10 a karamar hukumar Tsanyawa a jihar Kano a daren ranar Litinin bayan da suka kaddamar da hare-haren hadin gwiwa a wasu kauyukan da ke makwabtaka da su.

An ce maharan sun kai farmaki kauyukan Biresawa da Tsundu da misalin karfe 10 na dare, inda suka kwashe mutane biyar daga kowace al’umma.

Wani mazaunin Biresawa, Kabiru Usman, wanda iyalansa na cikin wadanda aka yi garkuwa da su, ya ce maharan sun zo ne da kafa kuma suna dauke da muggan makamai.

“Sun zo ne da bindigogi suka yi garkuwa da matata, Umma, ’yata ’yar shekara 17, Fati, matar yayana, da kuma wasu mata biyu,” in ji shi.

Usman ya kara da cewa al’ummar yankin sun yi yunkurin tinkarar maharan amma sun sha karfinsu saboda manyan makaman da ‘yan bindigar suka dauka. 

Ya kuma bayyana cewa tun da farko mazauna yankin sun sanar da jami’an tsaro bayan sun samu gargadin cewa ‘yan bindigan na tunkarowa yankinsu.

“Kafin harin, mun samu labarin cewa suna kan hanyarmu, don haka mun sanar da ‘yan sanda da sojoji saboda sun ba mu lambobin da za mu kira su idan akwai wata barazana,” inji shi.

Ya roki gwamnati da ta taimaka wajen ganin an sako mutanen da aka sace tare da karfafa tsaro a yankin.

Sai dai Haruna Abdullahi Kiyawa, mai magana da yawun rundunar ‘yan sandan jihar Kano ya ce rundunar za ta tabbatar da faruwar lamarin tare da fitar da sanarwa a hukumance.

Sace mutanen na baya-bayan nan dai na zuwa ne a daidai lokacin da ake samun karuwar hare-haren ‘yan bindiga a kan iyakokin Kano, wadanda ake zargin suna da alaka da kungiyoyin masu dauke da makamai da ke kaura daga makwabciyarta Jihar Katsina sakamakon wata yarjejeniyar zaman lafiya da ta shafi kananan hukumomin Ingawa, Kankia, da Kusada.

SHARE THIS