Rundunar ’yan sandan Jihar Sokoto ta kama mutane kusan 20 bayan wata zanga-zanga da aka gudanar a jihar domin neman a saki malamin addinin Musulunci, Dahiru Barewa.
Zanga-zangar ta gudana ne ranar Litinin a wasu sassan birnin Sokoto. Masu zanga-zangar sun bukaci a saki Barewa bayan da wata kotu ta bayar da umarnin ci gaba da tsare shi.
A cewar ’yan sanda, zanga-zangar ta rikide zuwa tashin hankali, inda ake zargin wasu matasa da kai wa jami’an tsaro hari tare da kokarin tilasta shiga wajen da ake tsare da Barewa domin su sake shi.
Mai magana da yawun rundunar ’yan sandan jihar, DSP Ahmed Rufai, ya tabbatar a ranar Talata cewa an kama mutane kusan 20. Ya ce an gurfanar da wadanda aka kama a gaban kotu.
Rahotanni sun ce masu zanga-zangar sun tare wasu hanyoyi tare da gudanar da taruka a sassa daban-daban na birnin, lamarin da ya haifar da tashin hankali kafin jami’an tsaro su shiga tsakani.
Kotun ta bayar da umarnin sake kama Barewa tare da tsare shi kan zargin yi wa wasu malaman addini, Sheikh Musa Ayyuba Lukuwa da Malam Murtala Bello Assada, barazanar kashe su.
Zargin ya samo asali ne daga wasu bidiyoyi da aka yada a kafafen sada zumunta, inda ake zargin Barewa da yin barazana ga malaman.
’Yan sanda sun bukaci mazauna jihar da su kwantar da hankalinsu tare da bin doka. Rundunar ta ce za ta ci gaba da daukar matakan kare rayuka da dukiyoyin jama’a.
Rahotanni sun ce yanzu an samu zaman lafiya a wuraren da lamarin ya faru, amma jami’an tsaro na ci gaba da kasancewa cikin shiri domin hana sake barkewar tashin hankali.
.jpeg)
0 $type={blogger}:
Post a Comment