Rukunin farko na Alhazan Jihar Kwara Su 560, sun Dawo Gida Bayan Kammala aikin Hajjin bana a ƙasar Saudiyya.

Rukunin farko na Alhazan Jihar Kwara Su 560 sun dawo lafiya zuwa Ilorin bayan kammala aikin Hajjin shekarar 2026 a ƙasar Saudiyya.

Alhazan sun sauka a Filin Jirgin Sama na Babatunde Idiagbon da ke Ilorin a yau Lahadi da misalin ƙarfe 12:23 na rana, ta hanyar jirgin Max Air, tare da jami’ai uku daga Hukumar Kula da Aikin Hajji ta Ƙasa (NAHCON).

Hukumar Kula da Jin Daɗin Alhazai ta Jihar Kwara ta tabbatar da isowarsu a cikin wata sanarwa da sakatariyar yada labarai, Jumoke Jimoh ta fitar.

Bayan saukarsu, wasu daga cikin alhazan sun bayyana godiyarsu ga Allah bisa nasarar kammala aikin Hajji cikin aminci da kwanciyar hankali.

Shugaban alhazai, Uthman Iyanda-Muhammad, ya bayyana cewa wannan shekarar ta kasance ta musamman, inda ya yaba wa gwamnatin jihar Kwara bisa inganta jin daɗin alhazai, musamman samar da abincin gida.

Sauran alhazai sun kuma yaba da yadda aka tsara tafiyar Hajjin, ciki har da masauki da abinci da kuma sufuri cikin tsari mai kyau.

Wata alhajiya, Rasheedat Saka, ta nuna godiya ga gwamnati bisa tabbatar da cewa aikin Hajji ya gudana ba tare da manyan matsaloli ba.

Iyalai da abokai da sauran jama’a sun tarbi alhazan a filin jirgin sama cikin farin ciki da murna yayin dawowarsu lafiya.

Hukumar ta kuma bayyana cewa ana sa ran isowar rukuni na biyu a ranar Talata, tare da tabbatar da cewa an kammala duk shirye-shiryen tarbarsu.

• Tweet
• Share
• Share
• Share
• Share