Iran ta harba makamai masu linzami zuwa cikin Isra’ila.

Rundunar Sojin Iran ta sanar da kai harin makamai masu linzami a wasu yankunan Isra’ila, kamar yadda kafar labarai ta Press TV ta ruwaito.

An bayyana harin a matsayin martani ga ci gaba da hare-haren da Isra’ila ke kaiwa a Lebanon, wanda Iran ke zargin cewa sun karya yarjejeniyar tsagaita bude wuta, tare da kai farmaki a yankunan fararen hula a kudancin Beirut da kudancin Lebanon.

Rahotanni daga kafafen labarai na Isra’ila sun ce an ji karar kararrawar gargadi a wurare da dama a arewa da tsakiyar ƙasar, ciki har da Haifa da Nazareth da Safed da Tiberias da tuddan Golan. 

Hukumomin Isra’ila sun kuma ce an sanya tsarin kariya na iska cikin shirin gaggawa tare da rufe makarantu saboda dalilai na tsaro.

Jagororin sojin Iran sun yi gargadi cewa idan hare-haren Isra’ila a Lebanon suka ci gaba, za a iya fuskantar ƙarin hare-hare masu tsanani. 

Sun kuma zargi Isra’ila da ƙara tsananta rikici a Lebanon, ciki har da amfani da makamai da aka haramta a duniya, kodayake ba a tabbatar da wannan ikirari daga wata tushe mai zaman kanta ba.

Rahoton ya kuma ce Iran ta taba gargadi cewa za ta mayar da martani idan aka faɗaɗa hare-hare zuwa kudancin Beirut, tare da jaddada cewa ci gaba da rikicin zai haifar da mummunan sakamako.

• Tweet
• Share
• Share
• Share
• Share