Atiku da Obi da Kwankwaso da Aregbesola Sun Jagoranci Zanga-zangar “Occupy INEC” a Abuja

Fitattun jagororin ‘yan adawa a Najeriya, ciki har da tsohon Mataimakin Shugaban Kasa, Atiku Abubakar da dan takarar shugaban kasa na jam’iyyar Labour Party, Peter Obi, da tsohon gwamnan Kano, Rabiu Musa Kwankwaso, tare da tsohon gwamnan Osun, Rauf Aregbesola, sun gudanar da zanga-zanga a hedikwatar Hukumar Zabe Mai Zaman Kanta ta Kasa (INEC) da ke Abuja.

Zanga-zangar wadda aka yi wa lakabi da “Occupy INEC” ta zo ne a daidai lokacin da ake samun karuwar takun-saka a siyasar kasar, musamman dangane da shirye-shiryen zaben 2027 da kuma rikice-rikicen cikin gida na jam’iyyun adawa.

Jagororin sun zargi INEC da aikata wasu matakai da suka ce na iya tauye dimokuradiyya, ciki har da nuna son kai da kuma tsoma baki a harkokin cikin gida na jam’iyyun siyasa. Sun bayyana damuwa cewa irin wadannan matakai na iya raunana jam’iyyun adawa tare da karkatar da akalar siyasa zuwa ga jam’iyya mai mulki.

Har ila yau, sun jaddada cewa akwai bukatar a tabbatar da gaskiya da adalci a harkokin zabe, tare da kare ‘yancin kai na INEC domin tabbatar da sahihancin zabe a Najeriya.

Zanga-zangar ta ja hankalin masu ruwa da tsaki da magoya baya, inda ake kallonta a matsayin wani sabon mataki na hadin gwiwar ‘yan adawa gabanin zabukan gaba.

SHARE THIS