Gwamnatin jihar Gombe ta haramta sana’ar sayar da karafa da aka fi sani da Bola Jari, saboda tabarbarewar tsaro da ke tattare da sana’ar.

Babban Lauyan Jihar kuma Kwamishinan Shari’a na Jihar, Barista Zubair Muhammad Umar ne ya sanar da dakatar da dokar a ranar Litinin, jim kadan bayan fadada taron Majalisar Tsaron Jihar da Gwamna Muhammadu Inuwa Yahaya ya jagoranta.

Umar ya bayyana cewa majalisar ta amince da dakatar da sana’ar karafan nan take ne bayan tantance cikakkun rahotannin barna ga wuraren ababen more rayuwa da kuma miyagun ayyuka a jihar.

Ya ce an kira taron ne domin duba matsalolin tsaro da suka kunno kai da kuma abubuwan da suka faru a jihar a baya-bayan nan, kuma majalisar ta fitar da wasu tsare-tsare masu nisa da tsauraran matakan tsaro da nufin karfafa tsaron lafiyar jama’a da kuma inganta tsaron cikin gida a fadin jihar.

Babban Lauyan ya kara da cewa majalisar ta nuna matukar damuwarta kan yadda ake ci gaba da barnatar da ababen more rayuwa a makarantu da sauran kadarorin jama’a wadanda galibi ke shiga hannun dillalan karafa.

Da yake bayani game da matsalar tsaro ta kasa da kuma illolinsa ga jihar, Umar ya ce majalisar ta kuduri aniyar kara sanya ido kan tsaro, musamman kan mutanen da suka koma jihar.

Ya yi bayanin cewa duk mutanen da ke neman zama ko masauki a cikin jihar daga yanzu za a bayyana su yadda ya kamata "tare da rubuta bayanan sirri don tattara bayanan sirri da baiwa hukumomin tsaro damar tantance mutane idan sun cancanta."

Dangane da rikicin manoma da makiyaya, babban lauyan gwamnatin ya bayyana cewa gwamnati ta kafa kwamitin tabbatar da doka don aiwatar da shawarwarin da ke kunshe a cikin 'farar takarda' kan kiwo da hanyoyin shanu.

Ya yi bayanin cewa, wannan farar takardar ta biyo bayan rahoton kwamitin da aka kafa a baya karkashin jagorancin Mataimakin Sufeto-Janar na ‘yan sanda (AIG), Zubairu Muazu mai ritaya, wanda ya yi nazari kan yanayin kiwo da hanyoyin shanu a fadin jihar.

Ya jaddada cewa an tsara matakan ne don inganta zaman lafiya, karfafa tsaro a cikin gida da kuma inganta tattara bayanan sirri.

Shima da yake nasa jawabin kwamishinan ‘yan sanda na jihar Gombe Umar Ahmad Chuso ya bayyana cewa jami’an tsaro sun zafafa kai hare-hare sakamakon sace-sacen mutane da kashe-kashe a garin Pindiga dake karamar hukumar Akko.

Da yake bayyana lamarin a matsayin abin takaici, CP ya tabbatar wa mazauna yankin cewa ana ci gaba da kokarin kubutar da mutanen da aka sace, da kamo wadanda suka aikata wannan aika-aika da kuma hana sake afkuwar lamarin.

SHARE THIS