Wannan rahoto na duba tarihin dangantakar ƙasar Indiya da Isra’ila tare da Falasɗinu, yayin da Firayim Ministan Indiya, Narendra Modi, ke shirin kai ziyarar aiki zuwa Isra’ila.
Tun bayan samun ‘yancin kai a 1947, Indiya ta kasance tana goyon bayan ‘yancin Falasɗinawa, inda ta amince da Falasɗinu a matsayin ƙasa kuma ta riƙa goyon bayan matsayinsu a Majalisar Ɗinkin Duniya. A wancan lokaci, Indiya ba ta gaggauta kulla cikakkiyar hulɗar diflomasiyya da Israel ba.
Sai dai a shekarar 1992, Indiya ta kafa cikakkiyar hulɗar diflomasiyya da Isra’ila, lamarin da ya buɗe sabon babi na haɗin kai, musamman a fannonin tsaro, noma da fasaha. Tun daga lokacin, dangantakar ƙasashen biyu ta ƙara ƙarfi, musamman a zamanin mulkin Modi.
A lokaci guda kuma, Indiya ta ci gaba da jaddada goyon bayanta ga Falasɗinu, tana kiran samar da ƙasashe biyu masu zaman kansu – Isra’ila da Palestinu – a matsayin mafita ga rikicin yankin.
Masana harkokin siyasa sun ce ziyarar Modi zuwa Isra’ila na nuna yadda Indiya ke ƙoƙarin daidaita alaƙarta a Gabas ta Tsakiya, ta hanyar ƙarfafa dangantaka da Isra’ila ba tare da watsi da tsohon matsayinta kan Falasɗinu ba.
Ana sa ran Firayim Ministan zai yi taka-tsantsan wajen bayyana matsayinsa kan batun Falasɗinu, domin kare muradun diflomasiyya da tattalin arziƙin Indiya.
Rahoton ya nuna cewa wannan tsarin “daidaito” na Indiya ya zama muhimmin ɓangare na manufofinta na ƙetare a wannan yanki mai cike da rikice-rikice, musamman a wannan lokaci da duniya ke fuskantar sauye-sauyen siyasa da tsaro.
Tags
Labarai
