Shahararren mawakin Hausa, Dauda Adamu Kahutu wanda aka fi sani da Rarara, ya soki fitaccen mawakin Afrobeats, David Adeleke (Davido), yana zarginsa da nuna Najeriya a mummunan yanayi a gaban duniya.
Rarara ya bayyana hakan ne bayan fitowar Davido a wajen bikin kidayar kwanaki kafin gasar cin kofin duniya ta 2026, inda mawakin ya saka wata riga mai dauke da rubutun “Bring Them Home” (Ku dawo da su gida) tare da sunayen daliban makaranta da malamai da aka sace a jihar Oyo.
Rahotanni sun ce ‘yan bindiga sun kai hari kan makarantu uku a karamar hukumar Oriire ta jihar Oyo, inda aka yi garkuwa da dalibai 39 da malamai bakwai a ranar 15 ga watan Mayu.
Bayan wasan kwaikwayon, Davido ya wallafa a shafinsa na sada zumunta cewa zai ci gaba da wakiltar Najeriya da alfahari, tare da yin addu’a ga wadanda abin ya shafa da iyalansu.
Sai dai Rarara, a wani bidiyo da ya wallafa a shafinsa na Facebook, ya bayyana matakin Davido a matsayin abin da bai dace ba, yana cewa nuna matsalar tsaro a idon duniya na iya bata wa Najeriya suna.
Ya tambayi dalilin da ya sa Davido ya dauki sunayen yaran da aka sace ya rubuta a tutar Najeriya tare da nunawa a Amurka, yana zargin cewa hakan na iya kasancewa da wata manufa ta siyasa.
Rarara ya ce matsalar tsaro abu ce mai matukar muhimmanci da bai kamata a yi amfani da ita wajen siyasa ba.
Ya kuma zargi wasu masu kirkirar abubuwan yanar gizo da yada abubuwan da ka iya amfani ga kungiyoyin masu laifi.
Ya kara da cewa ya kamata manyan mutane su fahimci cikakken yanayin lamuran tsaro kafin su yi magana a kansu.
.jpeg)
0 $type={blogger}:
Post a Comment