Farashin Mai Ya Sauka Kasa da Dala 80 Bayan Yarjejeniyar Amurka da Iran Ta Rage Fargabar Karancin Kaya

Farashin danyen mai ya sauka kasa da dala 80 kan kowace ganga a ranar Talata, bayan samun fatan cewa yarjejeniyar da ake shirin yi tsakanin Amurka da Iran za ta sa a sake bude mashigar ruwan Hormuz, lamarin da zai rage damuwar kasuwannin duniya kan matsalar samar da mai.

Man Brent, wanda shi ne ma’aunin farashin mai a duniya, ya ragu da kashi 4 cikin 100 zuwa dala 79.87 kan ganga, inda ya kai mafi karancin matsayi cikin watanni uku kafin daga baya ya dan farfado.

Haka kuma, danyen man Amurka mai suna West Texas Intermediate (WTI) ya fadi da kashi 4.7 cikin 100 zuwa kasa da dala 77 kan ganga.

Faduwar farashin ta biyo bayan sanarwar Shugaban Amurka cewa mashigar ruwan Hormuz za ta “budewa gaba daya” bayan Amurka da Iran sun kulla yarjejeniyar zaman lafiya a Switzerland ranar Juma’a.

Kafofin watsa labaran Iran sun ce wasu jiragen dakon mai da jiragen dakon kaya sun riga sun fara wucewa ta mashigar ruwan.

Masana harkokin kasuwa sun ce ana ganin yarjejeniyar ta fara kawo sauki a kasuwannin duniya, duk da cewa ‘yan kasuwa na ci gaba da lura da yiwuwar wasu matsaloli.

Wani masani ya bayyana cewa akwai alamun kasuwanni sun fara samun sauki sakamakon wannan yarjejeniya.

Sai dai masana sun yi gargadin cewa kasuwar mai na iya ci gaba da fuskantar matsin lamba na tsawon makonni ko watanni saboda rashin tabbas kan yadda za a dawo da wadatar mai bayan rikicin.

Ma’aikatar Makamashi ta Amurka ta kuma bayyana cewa ajiyar danyen man kasar ya kai matakin da bai taba kaiwa ba tun shekarar 1983, abin da ke nuna bukatar sake cike rumbunan mai.

A bangaren tattalin arziki, masu zuba jari na sa ido kan matakan manyan bankunan duniya. Ana sa ran Babban Bankin Amurka zai bar kudin ruwa yadda yake, haka kuma Bankin Ingila.

Kasuwannin hannayen jari a duniya sun nuna sauye-sauye, inda kasuwannin Turai suka rufe da karin daraja yayin da na Asiya suka kasance a gauraye.

Manyan alkaluman kasuwan danyen mai:

Brent crude: Dala 79.92 kan ganga (ya sauka da kashi 3.9%)

WTI crude: Dala 76.95 kan ganga (ya sauka da kashi 4.7%)

Dow Jones: maki 52,062 (ya karu da kashi 0.8%)

S&P 500: maki 7,538 (ya sauka da kashi 0.2%)

Nasdaq: maki 26,573 (ya sauka kadan)